设为首页  |  加入收藏
藏医系
 
首页藏医系概况机构设置党团建设教育教学学科建设师资队伍学生工作教改与科研学术与文化就业信息校友信息藏医名家
当前位置: 首页>>中文版>>藏医名家>>藏医历史人物>>正文
 
གཡུ་ཐོག་གསར་མ་ཡོན་ཏན་མགོན་པོ།
2019-03-25 15:29 གསོ་རིག་ཚན་པ། 

དེ་ནས་རབ་བྱུང་གཉིས་པའི་མེ་རྟ་སྤྱི་ལོ་༡༡༢༦ལོར་གཙང་མྱང་སྟོད་སྒོ་བཞི་རེ་ཐང་སྟེ་དེང་གི་གཞིས་རྩེ་ས་ཁུལ་རྒྱལ་རྩེ་རྫོང་མྱང་སྟོད་ཤང་ཁོངས་སུ་འཁྲུངས་པའི་བོད་ཀྱི་གསོ་རིག་ལོ་རྒྱུས་ཐོག་སྨན་བླ་གཉིས་པ་ལྟ་བུ་གཡུ་ཐོག་གསར་མ་ཡོན་ཏན་མགོན་པོ་ཞེས་སྙན་པའི་གྲགས་པས་ས་སྟེང་ཡོངས་ལ་ཁྱབ་པ་འདི་ཉིད་བྱུང་།   སྐྱེས་མཆོག་དེ་ཆུང་ངུའི་སྐབས་ནས་བྱིས་པ་ཚོགས་པའི་དབུས་སུ་རྩ་ཆུའི་བརྟག་པ་དང་།  ས་རྡོ་སྔོ་སོགས་ལ་སྨན་གྱི་ངོས་འཛིན་གྱི་ཚུལ་མཛད་པ་སོགས་བཟང་པོའི་བག་ཆགས་ལྷན་སྐྱེས་སུ་ཡོད་པ་དང་།  དགུང་ལོ་བརྒྱད་ནས་རིག་གནས་སྤྱི་དང་།  ཁྱད་པར་གསོ་རིག་གཞུང་ལུགས་ལ་གསན་བསམ་གནང་སྟེ་སྨན་དཔྱད་ཀྱིས་འགྲོ་དོན་བསྐྱངས།  དེ་ནས་གཡུ་ཐོག་ཆེན་པོ་དགུང་ལོ་བཅུ་བཞི་ཙམ་ལ་གོང་གི་སྟོད་སྟོན་ནམ་རོག་སྟོན་དཀོན་མཆོག་སྐྱབས་ཞུ་བ་དེ་དབུས་སུ་གྲྭ་བསྐོར་ལ་བྱོན་པའི་ལམ་བར་དུ་ཞབས་འབམ་གྱིས་སྙུང་ནས་གཡུ་ཐོག་ཆེན་པོ་བསྟེན་པས་སྙུན་ལས་གྲོལ་ཞིང་དགའ་བཞིན་དུ་དབུས་སུ་བྱོན།།ལོ་གཉིས་ཙམ་བཞུགས་པས་རོག་སྟོན་ལ་ཡང་བསྐྱར་ནད་ཤིན་ཏུ་ཐུ་བ་ཞིག་གིས་ཐེབས་པས་སྨན་པ་འགའ་ལ་གཏུགས་པས་དྲག་སྐྱེད་ཅི་ཡང་མ་བྱུང་བ་དབུས་པ་དར་གྲགས་ཀྱི་དྲུང་དུ་བཅར་ཏེ་སྨན་བཅོས་བགྱིས་པས་ནད་ལས་གྲོལ།  དེ་ལ་བརྟེན་ནས་དབུས་པ་དར་གྲགས་ལ་རོག་སྟོན་གྱིས་གཡུ་དྲུག་དམར་ནམ་མཁའ་གསལ་བ་ནས་ཁལ་སྟོང་རི་བ་ཞིག་ཡོད་པ་དེ་ཕུལ་ཏེ་གསོ་དཔྱད་ཀྱི་སློབ་དཔོན་ཞུས་ནས་རྒྱུད་བཞི་ཆ་ལག་ཁ་སྐོང་དང་བཅས་པ་ཞུས་ཏེ་འགྲོ་བ་ནད་པའི་དོན་མཛད་པར་གྲགས།   དེ་ནས་རོག་སྟོན་ཕྱིར་བྱོན་དུས་ལམ་བར་དུ་གཡུ་ཐོག་པའི་དྲིན་གསོ་བ་དང་།  རྒྱུད་འདི་ཕུལ་ན་མ་འོངས་པར་འགྲོ་ཕན་རྒྱ་ཆེར་ཡོང་བར་དགོངས་ནས་རྒྱུད་ཀྱི་མན་ངག་གཞུང་འགྲེལ་དང་བཅས་པ་ཡོངས་སུ་སྩལ་བས་གཡུ་ཐོག་པ་ཤིན་ཏུ་མཉེས་པའི་ངང་རོག་སྟོན་ལ་འབུལ་བ་གྱ་ནོམ་པ་ཕུལ་ཞིང་།  རེ་ཞིག་ཆིག་བརྒྱུད་ཀྱི་བཀའ་རྒྱ་མ་བཀྲོལ་བར་རྗེ་ཉིད་ཀྱིས་ཟབ་བཞེས་སུ་མཛད།   དགུང་ལོ་བཅོ་བརྒྱད་ཙམ་ནས་བཟུང་འཕགས་ཡུལ་དུ་ལན་དྲུག་དང་།   དེ་བཞིན་བལ་ཡུལ་དང་།   སིངྒལ།   གསེར་གླིང་ཚུན་ཆད་དུ་ཕེབས་ནས་མཁས་གྲུབ་དུ་མ་ལས་གསོ་དཔྱད་གསན་བཞེས་མཛད།   ཉིད་ཀྱི་གསུང་ལས་ཀྱང་།  རྒྱལ་བའི་བཀའ་མཆོག་ཡན་ལག་བརྒྱད་པ་དང་།།ཀླུ་སྒྲུབ་གཞུང་དང་ཟླ་ཟེར་དཀར་ནག་དང་།   །དྲང་སྲོང་ལུགས་དང་ཕ་ཁོལ་གཞུང་རྣམས་དང་།   །རྒྱ་གར་རྒྱ་ནག་མཁས་པའི་གཞུང་རྣམས་དང་།།བོད་དང་མི་ཡུལ་སྨན་པའི་ཉམས་མྱོང་དང་།།མཁའ་འགྲོའི་ལུང་དང་བུ་སློབ་བསོད་ནམས་ཀྱིས།།རྒྱ་ཆེའི་གཞུང་དང་བླ་མ་མང་བསྟེན་ནས།།སྐྱེ་བ་སྔོན་དུ་རང་རྒྱུད་སྦྱངས་པ་ལས།།ད་ལྟ་གཡུ་ཐོག་རིག་པ་ཁོང་ན་ཤར།   །ཞེས་གསུངས་པ་དང་།   དེ་ལྟ་བུའི་མཁས་མཆོག་དེ་ཉིད་ཀྱིས་ཕྱི་རབས་ནད་པ་རྣམས་དང་བུ་སློབ་ཀྱི་དོན་དུ།   ཐུགས་ཀ་ཆོས་ཀྱི་འཁོར་ལོ་ལས།།གསོ་དཔྱད་རིན་ཆེན་གཏེར་ཕྱུངས་ཏེ།།ཕྱི་རབས་རྗེས་འཇུག་གསོ་བའི་ཕྱིར།།ཞེས་གསུངས་ཏེ་སྨན་གཞུང་མང་པོ་ལྗགས་རྩོམ་གནང་བ་དཔེར་ན། བརྒྱད་པ་ཆེ་ཆུང་གི་སྙིང་པོ་བསྡུས་པ་དང་།  དཔའ་བོའི་སྙིང་པོ་བསྡུས་པའི་མདོ་གནས་ཀྱི་འགྲེལ་པ་མཐོང་བའི་མེ་ལོང་།  རྩ་དཔྱད་རིག་པ་རང་གསལ་སྡེ་ཚན་ལྔ་པ།   ལག་ལེན་པོད་ཆུང་།   མན་ངག་ཤོག་དྲིལ་སྐོར་གསུམ།   ཉམས་ཡིག་བུ་དོན་མ་ལ་སོགས་པ་ལྟ་བུའོ།   ཁྱད་པར་གཏེར་ནས་བཏོན་པའི་དཔལ་ལྡན་རྒྱུད་བཞི་འདི་ཉིད་གསོ་དཔྱད་ཀུན་གྱི་ཡང་རྩེར་གཟིགས་ནས་ཕྱི་རབས་ཀྱི་དོན་དུ་བཀའ་རྒྱ་བཀྲོལ་ཏེ་གངས་ཅན་གྱི་ལྗོངས་སུ་ལུས་ཅན་ཡོངས་ཀྱི་སྤྱི་ནོར་དུ་སྤེལ།  གཡུ་ཐོག་པར་རྒྱུད་ཀྱི་བཀའ་གཏེར་བཤད་སྲོལ་ཐམས་ཅད་ཀྱི་གཞུང་ལག་ལེན་དང་བཅས་པའི་གདམས་ངག་ཡོངས་རྫོགས་ཀྱི་བཀའ་བབ།   རྒྱུད་བཞི་མ་ཕྱི་དེའི་སྟེང་དུ་ཡན་ལག་བརྒྱད་པའི་སྙིང་པོ་བསྡུས་པ་རྩ་འགྲེལ་དང་།   དེ་མིན་སྔར་ཡོད་བོད་ཀྱི་སྨན་གཞུང་ལག་ལེན་དང་བཅས་པས་ཁ་སྐོང་།    གཡུ་ཐོག་རྙིང་མ་ནས་བཟུང་མི་རབས་བཅུ་གསུམ་བར་དུ་བརྒྱུད་པའི་ལག་ལེན་མན་ངག་གིས་ཟུར་བརྒྱན།   བདེ་གཤེགས་སྨན་གྱི་བླ་མས་དངོས་སུ་ཞལ་གཟིགས་ལུང་བསྟན་དབུགས་དབྱུང་བྱིན་གྱིས་རླབས་ཏེ་སྤྲུལ་པའི་དྲང་སྲོང་རིག་པའི་ཡེ་ཤེས་དང་།   ཡིད་ལས་སྐྱེས་ཀྱིས་ཞུ་བ་དང་།   ཞུ་ལན་གྱི་ཚུལ་དུ་རྒྱུད་བཞི་ཡོངས་རྫོགས་གསུངས་པའི་དག་པའི་གཟིགས་པ་ཉིད་གཞིར་བཞག་སྟེ།   བཀའ་དངོས་དང་ཁྱད་མེད་པའི་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་དམ་དཔལ་ལྡན་རྒྱུད་བཞི་ཞེས་འཛམ་གླིང་ཀུན་དུ་ཡོངས་སུ་གྲགས་པའི་གསོ་དཔྱད་ཀུན་གྱི་རྒྱལ་པོ་འདི་ཉིད་རྩོམ་སྒྲིག་གནང་།   སྐད་གསར་བཅད་ཀྱིས་གཏན་ལ་ཕབ་ནས་རྒྱུད་བཞི་ལ་བུའི་དོན་དུ་གསེར་མཆན་དང་།  སློབ་མའི་དོན་དུ་ཟོང་མཆན་གཉིས་བཏབ།   རྒྱུད་བཞིའི་རྩ་བར་མ་ཚང་བ་རྣམས་གོང་དུ་བརྗོད་པའི་སྨན་དཔྱད་ཟླ་བའི་རྒྱལ་པོ་དང་ཡན་ལག་བརྒྱད་པའི་སྙིང་པོ་བསྡུས་པ།  འགྲེལ་པ་ཟླ་ཟེར་སོགས་ཀྱི་ཉིང་ཁུ་དང་།  བོད་ཀྱི་ཡུལ་དུས་དང་མཚུངས་པར་རྩ་རྒྱུད་དུ་རྒྱུད་ལེའི་གྲངས་དང་།   བཤད་རྒྱུད་དུ་ཇ་དང་སྨན་ཟས་ལེའུ་སོགས་སུ་ཐོར་བུའི་སྣོན་ཁ་བགྱིས།   ཕྱི་རྒྱུད་དུ་སྨན་དཔྱད་ཟླ་བའི་རྒྱལ་པོའི་དགོངས་པ་རྩ་ཆུའི་བརྟག་པ་དང་།   མ་བུ་དགྲ་གྲོགས།    ཇ་དཀར་ཡོལ་སོགས་མན་རྒྱུད་དུའང་དོན་གོང་མཚུངས་ཀྱི་སྣོན་ཁ་མང་པོ་མཛད།  རྒྱུད་ཀྱི་གཞུང་འགྲེལ་མན་ངག་ཁ་སྐོང་དང་བཅས་པའི་གོ་ཆོད་དུ་ཆ་ལག་བཅོ་བརྒྱད་ལེགས་པར་བསྒྲིགས་ནས་སྐལ་ལྡན་གྱི་ཐུགས་སྲས་དམ་པ་སུམ་སྟོན་ཡེ་ཤེས་གཟུངས་ལ་བུམ་པ་གང་བྱོའི་ཚུལ་དུ་བསྩལ།  རྗེ་འདི་ལ་བུ་སློབ་ནམ་མཁའི་སྐར་ཚོགས་བཞིན་བགྲངས་བར་མི་དཔྱོད་པ་བྱུང་བའི་གཙོ་བོ་སྣོད་ལྡན་སྐལ་བཟང་གི་སློབ་བུ་གོང་སྨོས་སུམ་སྟོན་ཡེ་ཤེས་གཟུངས་ཀྱིས་དབུ་མཛད་པའི་ལྗང་སྨན་ལེབ་སེ་དང་།   འབལ་སྨན་ཉི་མ།  སྟོན་པ་ཨ་ཚེས།   ཤག་རམ་ཉི་མ་དཔལ།   གཡུ་ཐོག་བསོད་ནམས་སེང་གེ།   དགེ་བཤེས་རོག་ཆུང་སོགས་མཁས་པ་མིང་དང་དོན་མཐུན་པ་སུམ་བརྒྱར་ཉེ་བ་བྱུང་།  མདོར་ན་གཡུ་ཐོག་ཆེན་པོའི་སྐུ་ཚེ་གཅིག་གི་རིང་ལ་འཕགས་བོད་ཀྱི་མཁས་པ་མང་པོའི་ཞལ་མཇལ་ཞིང་།  གདམས་པ་སྣ་ཚོགས་ཐོས་པ་དང་།  ལྷག་ཏུ་དགེ་བའི་བཤེས་གཉེན་གྱི་ཞབས་ལ་གཏུགས་ནས་སྨན་དཔྱད་བསྐྱངས་ཏེ་འགྲོ་ཕན་ཆེད་དུ་མི་ལོ་མང་པོ་བཞུགས་པའི་རིང་བུ་སློབ་ཀྱི་དོན་དུ་ཤོག་དྲིལ་སྐོར་གསུམ་བཀོད་དེ་སྐུ་ཚེ་དོན་དང་ལྡན་པའི་ངང་ནས་མཐར་ཕྱིན་པར་བརྟེན་ཉིད་ཀྱི་ཞལ་ནས་ཀྱང་།   ཀུན་དང་ཞལ་མཇལ་གདམས་པ་སྣ་ཚོགས་ཐོས།   །བླ་མ་བསྟེན་དང་གསོ་དཔྱད་བསྐྱངས་པ་ཡིས།།མི་ལོ་མང་པོ་འཇིག་རྟེན་ཁམས་སུ་བསྡད།   །བུ་སློབ་དོན་དུ་ཤོག་དྲིལ་སྐོར་གསུམ་བཀོད།།ད་ནི་གཡུ་ཐོག་ཤི་ཡང་འགྱོད་པ་མེད།།ཅེས་གསུངས་ནས་དགུང་ལོ་དོན་དྲུག་སྟེ་བོད་ལྕགས་བྱ་སྤྱི་ལོ་༡༢༠༡ལོར་གཟུགས་སྐུའི་བཀོད་པ་བསྡུས་སོ།།

 

 

 

关闭窗口
西藏藏医学院藏医系  联系电话:0891-6385834
地址:西藏拉萨市当热路10号  邮政编码:850000