ལོ་ཆེན་རིན་ཆེན་བཟང་པོ་ནི་བོད་ས་རྟ་སྤྱི་ལོ་༩༥༨ལོར་ཡབ་གཞོན་ནུ་དབང་ཕྱུག་དང་། ཡུམ་ཅོག་རོ་ཀུན་བཟང་ཤེས་རབ་བརྟན་པ་གཉིས་ཀྱི་སྲས་སུ་མངའ་རིས་གུ་གེའི་ཆ་སྙུང་ཝཾ་རཏྣ་ཞེས་པར་སྐུ་བལྟམས། སྐུ་ན་ཆུང་ངུའི་དུས་ནས་རིག་གནས་ལ་མཁས་པར་སྦྱངས། སྔ་ཕྱིར་ཁ་ཆེ་དང་། རྒྱ་གར་སོགས་སུ་ཕེབས་ཏེ་ཕྱི་ནང་རིག་གནས་ཐམས་ཅད་ལ་མཁས་པར་བསླབས། ཕྱིར་ཕེབས་ནས་བཀའ་བསྟན་མང་པོ་བོད་དུ་བསྒྱུར། ཁོང་གིས་བསྒྱུར་བའི་རྗེས་ཀྱི་གསང་སྔགས་ལ་གསང་སྔགས་གསར་མ་ཞེས་འབོད། ཕྱི་ནང་རིག་གནས་ཀྱི་གཙུག་ལག་རྒྱ་མཚོའི་ཕ་རོལ་དུ་སོན། ལྷ་བླ་མ་ཡེ་ཤེས་འོད་ཀྱིས་བཟང་པོའི་མཐུན་རྐྱེན་དང་ལྷག་བསམ་གྱི་བསྐུལ་མ་གནང་བར་བརྟེན་ལོ་ཆེན་རིན་ཆེན་བཟང་པོས་འཕགས་ཡུལ་གྱི་སློབ་དཔོན་དཔའ་བོས་མཛད་པའི་ཡན་ལག་བརྒྱད་པའི་སྙིང་པོ་བསྡུས་པ་དང་དེའི་འགྲེལ་པ་ཁ་ཆེ་པཎ་ཆེན་ཟླ་བ་མངོན་དགས་མཛད་པའི་ཟླ་ཟེར་སོགས་བོད་ཡིག་ཏུ་ཡང་དག་པར་བསྒྱུར་ཏེ་གཏན་ལ་ཕབ་པར་མཛད། དེ་ནི་རྒྱ་གཞུང་ཡན་ལག་བརྒྱད་པའི་སྙིང་པོ་བསྡུས་པ་འགྲེལ་པ་དང་བཅས་ཆ་ཚང་བར་བོད་དུ་བསྒྱུར་བའི་ཐོག་མ་ཡིན། དེས་བོད་ཀྱི་གསོ་བ་རིག་པ་འདི་ཉིད་སྔར་བས་འཕེལ་རྒྱས་དང་འཐུས་ཚང་དུ་གཏོང་རྒྱུར་མཆོག་ཏུ་གྱུར་པའི་དཔྱད་གཞིའི་ཡིག་རིགས་ཚད་ལྡན་ཞིག་ཏུ་གྱུར་སྟབས་ཕྱིས་སུ་ཤིང་པར་བརྐོས་ནས་བསྟན་འགྱུར་གྱི་ཁོངས་སུ་འཇོག་གནང་མཛད་ཡོད་ཅིང་། ཕྱོགས་མཚུངས་ལོ་ཆེན་ཉིད་ཀྱིས་སྣོད་ལྡན་གྱིས་སློབ་བརྒྱུད་མང་པོ་གསོ་སྐྱོང་མཛད་པའི་ནང་ནས་མཁས་པའི་གྲགས་པ་ཆེ་བ་མང་མོ་སྨན་བཙུན་དང་། མྱང་འདས་སེང་གེ་སྒྲ། ཤཱཀྱ་ཁྲི་ཡེ་ཤེས་འབྱུང་གནས། ཨོང་སྨན་ཨ་ལེ་སྟེ་སྤུ་ཧྲེང་གི་སྨན་པ་མི་བཞི་བྱ་བ་སོགས་བྱུང་ཞིང་། དེ་དག་ལ་རྒྱ་གཞུང་ཡན་ལག་བརྒྱད་པའི་དགོངས་དོན་འཆད་སྤེལ་གྱི་རྒྱུན་སྤེལ་བ་ལ་བརྟེན་ནས་བོད་དུ་ཡན་ལག་བརྒྱད་པའི་སྙིང་པོ་བསྡུས་པའི་གཞུང་དོན་ལ་སློབ་སྦྱོང་དང་། ལག་ལེན། ཞིབ་འཇུག་བྱེད་པའི་ལམ་བུ་གཏོད་ལ། སློབ་མ་དེ་དག་གི་ནང་ནས་ཀྱང་མང་མོ་སྨན་བཙུན་པ་ནི་མཁས་པའི་རྩེར་སོན་པས་དབུས་གཙང་གི་སྨན་པ་ཕལ་མོ་ཆེས་མཇལ་ཞིང་ཞབས་ལ་གཏུགས། ལྷག་པར་དེས་ལྷ་རྩེ་མང་མཁར་གྱི་ཆེར་རྗེ་ཏི་པང་ལ་གཞུང་ཟླ་ཟེར་མན་ངག་དང་བཅས་པ་རྫོགས་པར་འཆད་སྤེལ་མཛད། དེས་ཀྱང་རང་གི་སྲས་བྱང་ཆུབ་འོད་དང་། ཨུ་ལང་བཀྲ་ཤིས་མཁར། དགྲ་ལས་རྒྱལ་པོ་གསུམ་ལ་སྤེལ་གནང་བས་ཨུ་ལང་བཀྲ་ཤིས་མཁར་ནི་གཞུང་འགྲེལ་ལག་ལེན་ཀུན་ལ་མཁས་པར་གྱུར་ཐོག་སློབ་བརྒྱུད་ཀྱང་དབོན་ཇོ་བཀྲ་དང་འབྲོ་ཚ་ཇོ་ནག་སོགས་བྱུང་བ་རྣམས་ལ་སྔ་རབས་ཀྱི་སྨན་བླ་ལྟ་བུ་བཅུར་གྲགས་ཤིང་། དེ་དག་ལས་མང་མཁར་ཆེར་རྗེའི་བརྒྱུད་པ་ཞང་སྟོན་ཞིག་པོའམ་ཐུགས་རྗེའི་ཁྲི་འོད་ཀྱིས་ཞུས་པ་ན་དེ་ཉིད་སྨན་དཔྱད་ཀྱི་རིག་པ་མཐར་ཕྱིན་པར་གྱུར་ཏེ་ཤེས་བྱ་སྤྱིའི་ཁོག་འབུགས་རྒྱལ་མཚན་རྩེ་འབར་དང་། ས་བཅད་དོན་ཁྲིགས་འབྱེད་པའི་ལྡེ་མིག་དཀའ་ཚོམས་གེགས་སེལ་གནམ་ལྕགས་འཁོར་ལོ། ཡན་ལག་བརྒྱད་པའི་ཚིག་དོན་ཞིབ་རྒྱས་སུ་འགྲེལ་པ་མུ་ཏིག་ཕྲེང་བ་རྒྱས་བསྡུས་གཉིས། ལག་ལེན་དམར་ཁྲིད་རྒན་མོ་མཛུབ་ཚུགས་ཀྱི་ཚུལ་དུ་འཆད་པ་བདུད་རྩིའི་ཐིགས་པ་རྣམས་བརྩམས། གཞུང་ལ་ཡང་ནག་མཆན་ལེགས་པར་བཏབ། སློབ་བརྒྱུད་ཀྱང་དུ་མ་བྱུང་བའི་ནང་ནས་གཙང་སྟོད་དར་མ་མགོན་པོ་ཞུ་བ་དེས་སློབ་མའི་དོན་དུ་ཟིན་ཏིག་དང་བུའི་དོན་དུ་ཡང་ཏིག ཅེས་པའི་མན་ངག་གི་གཞུང་གདམས་མཛད། དེ་དག་གི་བརྒྱུད་འཛིན་པ་བོ་དོང་རོག་ཚོའི་སྐོར་ན་མང་བར་གྲགས་ལ་ཇོ་བོ་རྗེ་དང་། ནག་ཚོ་ལོ་ཙཱ་བས་ཤ་སྦྱོར་བདུད་རྩི་དར་ཡ་ཀན་བྱ་བ་བསྒྱུར་བ་དང་། མདོ་དཔྱད་དྲ་བ་སྡོམ་པ་སོགས་མན་ངག་ཁ་ཤས་མཛད། ཞང་ཞུང་པ་ཤེས་རབ་འོད་（འཁོར་ལོ་རྒྱལ་པོ་ཡང་ཟེར་）ཀྱིས་ཀྱང་སངས་རྒྱས་ཁོག་འབུགས་གསེར་གྱི་བང་མཛོད། ཅེས་པ་སོགས་མཛད་དེ་གཡུ་ཐོག་རྒྱ་གར་རྡོ་རྗེ་སོགས་ལ་གནང་ནས་སློབ་བརྒྱུད་ཀྱང་སྤེལ་བར་གྲགས་ཤིང་། མདོར་ན་ལོ་ཆེན་དེ་ཉིད་ཀྱི་ཐུགས་རྗེའི་འཕྲིན་ལས་ལ་བརྟེན་ནས་སླར་ཡང་སྟོད་ཕྱོགས་གཙང་གི་རྒྱུད་དུ་བོད་ཀྱི་སྨན་པ་གཞན་ཕན་ཅན་རྣམས་གྱེས་ཤིང་གསོ་དཔྱད་ཀྱི་བསྟན་པ་དགུང་ན་གྲགས་སོ།།དེ་བས་ན་ལོ་ཆེན་རིན་བཟང་བརྒྱད་པའི་བཤད་སྲོལ་དར།།ཞེས་པ་སོགས་བྱུང་ངོ་།།
