ཀརྨ་པ་རང་བྱུང་རྡོ་རྗེ་ནི། བོད་ཤིང་སྤྲེལ་སྤྱི་ལོ་༡༢༨༤ལོར་མངའ་རིས་ལ་སྟོད་མང་ཡུལ་དུ་ཡབ་སྟོན་པ་ཆོས་དཔལ་དང་། ཡུམ་ཇོ་མོ་གཡང་འདྲེན་གྱི་སྲས་སུ་སྐུ་འཁྲུངས། དགུང་ལོ་གསུམ་ལ་ཕེབས་སྐབས་ཡབ་ཡུམ་སོགས་ལ་ང་ཀརྨ་པ་ཡིན་གསུང་བ་སོགས་སྔོན་གནས་དྲན་པའི་གསུང་མང་དུ་བྱོན། གྲུབ་ཆེན་ཨུ་རྒྱན་པ་དང་འཇལ་སྐབས་སྔོན་གནས་དྲན་པའི་གསུང་མང་དུ་གནང་བས་གྲུབ་ཆེན་ཨུ་རྒྱན་པས་རང་བྱུང་རྡོ་རྗེ་ཞེས་མཚན་གསོལ། གྲུབ་ཆེན་དེ་ཉིད་ཀྱི་དྲུང་ནས་དགེ་བསྙེན་གྱི་སྡོམ་པ་དང་། འཁོར་ལོ། བདེ་མཆོག ཀྱཻ་རྡོར། ཕུར་པ་སོགས་ཀྱི་དབང་ཁྲིད་རིགས་མང་པོ་སོགས་གྲུབ་ཆེན་ཨུ་རྒྱན་པའི་གདམས་པ་མང་པོ་བུམ་པ་གང་བྱོའི་ཚུལ་དུ་གནང་ནས་ཐུགས་སྲས་ཀྱི་དམ་པར་གྱུར། ལྷག་པར་དུ་རྒྱ་གར་འཕགས་པའི་ཡུལ་ནས་གྲུབ་ཆེན་ཉིད་ལ་རྗེ་བཙུན་རྡོ་རྗེ་རྣལ་འབྱོར་མས་གནང་བའི་དངུལ་ཆུ་གྲུབ་པའི་གདམས་པ་སྙན་བརྒྱུད་རྡོ་རྗེའི་ཚིག་རྐང་ཞེས་པའི་མཁའ་འགྲོའི་གདམས་པ་ཁྱད་པར་ཅན་དེ་ཀརྨ་རང་བྱུང་རྡོ་རྗེར་ཆིག་བརྒྱུད་དུ་གནང་། རང་བྱུང་རྡོ་རྗེས་སྙན་བརྒྱུད་རྡོ་རྗེའི་ཚིག་རྐང་གི་གསང་གནད་རྣམས་ལ་འགྲེལ་པ་དང་། ལག་ལེན་གྱི་གསལ་ཁ་མཛད་ནས་གངས་ཅན་བོད་ཀྱི་ཡུལ་དུ་གདམས་པ་དེའི་ལག་ལེན་གྱི་ལམ་སྲོལ་སླར་ཡང་བཏོད་དེ་རིས་སུ་མ་ཆད་པའི་སྐྱེ་འགྲོ་ཀུན་ལ་བདུད་རྩི་དརྱ་ཀན་དེ་ཡི་ལོངས་སྤྱོད་སྲོག་སྦྱིན་གྱི་སྐལ་བ་བཟང་པོའི་རྒྱུན་དུས་ད་ལྟའི་བར་དུ་མ་ཉམས་པར་སྤེལ་བ་འདི་དག་སྐྱེས་བུ་དམ་པ་དེ་དག་གི་བཀའ་དྲིན་ལས་གཞན་ཅི། གཞན་ཡང་རྒྱལ་བའི་དབང་པོ་འདིས་སྨན་སྣ་བརྒྱད་བརྒྱ་སུམ་ཅུ་ལྷག་གི་སྨན་ནུས་ངོས་འཛིན་སོགས་ཞིབ་ཕྲར་འཁོད་པའི་སྔོ་འབུམ་རྒྱས་པ་སྨན་མིང་རྒྱ་མཚོ་ཞེས་པ་སྨན་རྫས་རིག་པའི་བསྟན་བཅོས་མཆོག་ཏུ་གྱུར་པ་ཞིག་མཛད་པ་དེར་ཕྱིས་ཀྱི་སྨན་པ་མཁས་པ་ཀུན་གྱིས་གཞི་འཛིན་ས་བྱེད་དོ།