བྱང་པ་རྣམ་རྒྱལ་གྲགས་བཟང་ནི་གཙང་སྟོད་ངམ་རིང་གི་རྒྱལ་སྡེ་ཆེན་པོར་མི་ཉག་སེའུ་རྒྱལ་པོའི་གདུང་བརྒྱུད་ལས་བྱུང་བའི་ཡབ་ཆོས་རྒྱལ་དཔལ་བཟང་དང་། ཡུམ་འབུམ་སྐྱོང་རྒྱལ་མོ་གཉིས་ཀྱི་སྲས་སུ་རབ་བྱུང་བདུན་པའི་ཤིང་ཕག་ལོར་（སྤྱི་ལོ་༡༣༩༥－༡༤༧༥）སྐུ་འཁྲུངས། ཁོང་གིས་ལོ་ཆེན་བྱང་ཆུབ་རྩེ་མོ་དང་། བོ་དོང་ཕྱོགས་ལས་རྣམ་རྒྱལ། པཎ་ཆེན་ནགས་ཀྱི་རིན་ཆེན་སོགས་རྒྱ་བོད་ཀྱི་ཚད་ལྡན་ཡོངས་འཛིན་དུ་མའི་དྲུང་ནས་མདོ་སྔགས་ཀྱིས་མཚོན་ཤེས་བྱ་རིག་པའི་གནས་ཐམས་ཅད་ལ་སྦྱངས་པ་དཔྱིས་ཕྱིན་པར་མཛད་པ་དང་རྒྱ་ནག་གོང་མ་ཏཱ་མིང་གིས་ཏའི་སི་ཏུའི་གོ་ས་གནང་། དགུང་ལོ་སོ་གཅིག་གི་སྟེང་སེང་གེ་རྩེ་བའི་སྲས་མོ་ནམ་མཁའ་དཔའ་འབུམ་ཁབ་ཏུ་བཞེས་ནས་སྲས་ལྕམ་སྲིང་རྣམས་འཁྲུངས། མདོ་སྔགས་སྤྱིར་དེ་བཞིན་གཤེགས་པའི་གདུང་རབས་སོགས་བསྟན་བཅོས་སུམ་ཅུ་རྩ་ལྔ་དང་། དཔལ་དུས་ཀྱི་འཁོར་ལོ་ཕྱི་ནང་གཞན་གསུམ་ལས་རྩིས་ཀྱི་བསྟན་བཅོས་བྱིས་པ་བདེ་བླག་ཏུ་འཇུག་པ་སོགས་བསྟན་བཅོས་བཞི་བཅུ་ཞེ་གཉིས། དབང་ལེ་དང་སྒྲུབ་ལེའི་དོན་འགྲེལ་བསྟན་བཅོས་ལྔ་བཅུ་རྩ་བཞི། ལུས་དཀྱིལ་རྫོགས་རིམ་ལམ་དུས་སོགས་ཡེ་ཤེས་ལེའུའི་དོན་འགྲེལ་བཅུ་གཉིས། སྒྲ་རིག་པའི་ཉིང་ཁུ་ཀ་ལཱ་པའི་མདོ་རྒྱན། བཟོ་རིག་པར་དེ་བཞིན་གཤེགས་པའི་སྐུ་གཟུགས་ཀྱི་ཆ་ཚད་ཅེས་པ་སོགས་མཛད། ལྷག་པར་གསོ་རིག་ལ་སྦྱངས་པ་ཕུལ་དུ་ཕྱིན་སྟབས་ཡན་ལག་བརྒྱད་པ་ཐམས་ཅད་ཀྱི་སྙིང་པོ་བསྡུས་པ་ཡིད་བཞིན་ནོར་བུ་རིན་པོ་ཆེ་ཞེས་བྱ་བ་ལེའུ་བརྒྱ་དང་ཉི་ཤུའི་བདག་ཉིད་ཅན་ཞིག་དང་། རྩ་རྒྱུད་ཀྱི་འགྲེལ་པ་རྒྱུད་དོན་གསལ་བྱེད་སྒྲོན་མ། བཤད་རྒྱུད་ཀྱི་འགྲེལ་པ་བདུད་རྩི་ཆུ་རྒྱུན་དང་། ཊིག་ཆུང་དོན་གསལ། ཕྱི་མ་རྒྱུད་ཀྱི་དཀའ་འགྲེལ་དགོས་འདོད་འབྱུང་བ། ཡོངས་གཏད་ཀྱི་འགྲེལ་པ་ཚིག་དོན་རྣམ་པར་གསལ་བ། སྨན་གཞུང་རིན་ཆེན་སྒྲོམ་བུ། རྩོམ་པ་ཆུང་བ་རྒྱུད་བཞིའི་དཀའ་འཕྲང་མུན་སེལ། གསོ་ཐབས་སུམ་བརྒྱ་དྲུག་ཅུའི་ངོས་འཛིན། རྩ་བཤད་གསལ་བའི་སྒྲོན་མེ། སྲོག་གཅོད་ནད་དགུའི་དབྱེ་བ། འཚོ་བྱེད་རྣམས་ལ་སྙིང་ནས་བརྩེ་བའི་མན་ངག་འཕྲུལ་གྱི་ཡིག་ཆུང་། སེང་གེ་རྩེའི་འཚོ་བྱེད་ཀྱི་དྲིས་ལན་སོགས་མཛད་དེ་འཆད་རྩོད་རྩོམ་གསུམ་གྱི་སྒོ་ནས་བོད་སྟོད་བྱང་ཁུལ་གྱི་ས་བབས་དང་། གནམ་གཤིས། འཚོ་བ་སྤྱོད་སྟངས་སོགས་ཀྱི་ཁྱད་ཆོས་དངོས་དང་བསྟུན་ནས་སྨན་བཅོས་བྱ་ཐབས་ཀྱི་ཐུན་མོང་མ་ཡིན་པའི་ཉམས་མྱོང་རྣམས་ཕྱོགས་བསྡོམས་གནང་སྟེ་གཞུང་འགྲེལ་བརྩམས་པ་དང་། སྨན་སྦྱོར་གསར་བཟོ། སྨན་རྫས་ངོས་འཛིན་སོགས་བྱང་ལུགས་ཀྱི་ཁྱད་ཆོས་རྣམས་དར་སྤེལ་བཏང་ཞིང་མི་ཡི་ཉི་མ་མཐོང་བ་དོན་ལྡན་སོགས་རྗེས་འཇུག་གི་སློབ་མ་མང་དུ་བསྐྱངས་པ་བཅས་ལ་བརྟེན་ནས་བྱང་ལུགས་ཞེས་པའི་སྲོལ་གཏོད་པར་མཛད་དོ།།
