ཟུར་མཁར་མཉམ་ཉིད་རྡོ་རྗེའམ་དྷརྨ་སྭ་མི་སྟེ་ཨའོ་ཆོས་རྗེ་ཞུ་བ་ནི་རབ་བྱུང་བདུན་པའི་ས་ལུག་（སྤྱི་ལོ་༡༤༣༩－༡༤༧༥）ལོར་ཤར་ལ་ཐོག་ཟུར་མཁར་དུ་ཡབ་རིག་འཛིན་ཕུན་ཚོགས་དང་། ཡུམ་ཀུན་མཁྱེན་བཀྲ་ཤིས་རྣམ་རྒྱལ་གྱི་ལྕམ་མོ་གཉིས་ཀྱི་སྲས་སུ་འཁྲུངས། རང་གི་ཡབ་དང་། ཁྲུས་ཁང་ལོ་ཙཱ་བ། ཤ་ར་རབ་འབྱམས་པ། སྨན་དོན་དབང་ཕྱུག་བཟང་པོ་སོགས་དམ་པ་དུ་མ་བསྟེན་ནས་རིག་གནས་སྤྱི་དང་ཁྱད་པར་གསོ་བ་རིག་པར་སྦྱངས་པ་རྩལ་དུ་ཐོན། དགུང་ལོ་བཅུ་ལ་ཕེབས་དུས་ཆོས་དབྱིངས་རྩེར་བཞུགས། ཞག་གསུམ་གྱི་རིང་རྗེ་གཡུ་ཐོག་ཡོན་ཏན་མགོན་པོར་གསོལ་བ་རྩེ་གཅིག་ཏུ་བཏབ་པས། ཞལ་དངོས་སུ་བསྟན་ཏེ་གསོ་རིག་རྒྱུད་བཞིའི་སྙིང་ཏིག་ཤོག་དྲིལ་དང་བཅས་པའི་ཚིག་དོན་དགོངས་གཞི་ཞལ་ཤེས་ཐམས་ཅད་ཀྱི་ལུང་སྩལ་ཞིང་། སྙིང་ཏིག་ཆ་ལག་འགའ་ཞིག་དང་། དཔལ་ལྡན་རྒྱུད་བཞི་འདིར་རྒན་རབས་རྨོངས་པས་རྣམ་པར་བསླད་དེ་མ་དག་པའི་ཆ་ཇི་སྙེད་ཅིག་ཞུགས་འདུག་པར་བྱི་དོར་གྱིས་ཤིག་ཅེས་པའི་གསུང་གི་གནང་བ་ཐོབ། གསོལ་འདེབས་དད་པའི་རྦ་རླབས་སུ། འཇམ་མགོན་གུ་ཎས་དངོས་སམ་རྨི་ལམ་དུ།།དགྱེས་ཤིང་ལེགས་བཤད་རྒྱུན་མི་ཆད་སྩོལ་བའི། །འཁྲུལ་ཞིག་སྨན་པ་ཀུན་གྱི་གཙུག་རྒྱན་ལ།།ཞེས་པ་ལྟར་རྗེ་བཙུན་གཡུ་ཐོག་པས་དངོས་ཉམས་རྨི་ལམ་ཅི་རིགས་པར་ལེགས་བཤད་འདོམས་ཏེ་ཟབ་མོ་སྟོང་པ་ཉིད་ཀྱི་དོན་ཕྱིན་ཅི་མ་ལོག་པ་ཐུགས་སུ་འཁྲུངས་པ་འཁྲུལ་བ་ཐམས་ཅད་ཞིག དགུང་ལོ་བཅུ་བཞིའི་སྐབས་བྱང་པ་འཚོ་བྱེད་མིའི་ཉི་མས་དྲི་རྨེད་མཛད་པ་ནི། ཤྲཱི་བཛྲས་ཏྭ་ན་མ་མཱི།།ཨེ་རོང་ནས་འཚོ་བྱེད་དགེ་བཤེས་མཁས་པ་ཞིག་གིས་ཆེད་དུ་རྩད་གཅོད་དུ་བཏང་བྱུང་བ་ལ། ལོ་རྒྱུས་ཐོས་པས་ངེད་སེམས་སྤྲོ་བྱུང་ནའང་། གནས་ཀྱིས་བསྐལ་ནས་མཇལ་བ་དཀའ་བ་འདྲ། ཁྱེད་སྐྱེས་བུ་སུ་ཞིག་གི་དྲིན་ལས་རིག་བྱེད་གང་ལ་མཁས། རིགས་རུས་ཆོ་འབྲང་གང་ཡིན། གཞུང་ལུགས་ཆེ་བ་གང་ལ་རྒྱབ་བརྟེན། མཁས་པ་མི་དགུའང་དེ་ལས་གཞན་པའི་མན་ངག་གང་ལ་འདྲིས། སྨན་དཔྱད་ལག་ལེན་ཁྱད་པར་ཅན་གང་དང་གང་མཛད། མྱོང་བ་གང་སྐོར་ལ་གདེངས་དང་ལྡན། ནང་རིག་པ་ལས་ལྷག་པར་བཀའ་མ་དང་གཏེར་མ་གང་ལ་ཐུགས་དམ་གྱི་སྙིང་པོར་བཞེད། གནས་ངེས་པ་ཅན་ནམ་ངེས་པ་མེད། ངེད་ལ་བརྟེན་པ་འགའ་ཞིག་ཕོ་ཉ་དང་འཕྲིན་གྱིས་མཚམས་སྦྱར་ན་དྲུང་དུ་བསྙེན་དུ་ཨེ་རུང་། གཞན་དོན་དུ་འདི་ངོས་ལ་ཕེབས་པ་ཙམ་བསྐུལ་ན་དོན་ལ་ཕེབས་པ་ཨེ་འཆར། ཁྱོད་ཉིད་ཀྱིས་མཛད་པའི་བསྟན་བཅོས་ཇི་ཙམ། ངེས་ཀྱང་མཚན་ཇི་སྐད་འབོད། ཁོ་བོ་སྔོན་ཁྱེད་དང་ལས་དཀར་པོས་འབྲེལ་བ་ཞིག་ཡིན་པར་གདོན་མི་ཟ་བའི་ངེས་ཤེས་མང་པོ་ཡོད་པས། ཐུགས་རིངས་དང་བརྙས་ཐབས་མ་ཡིན་པའི་ལན་རྣལ་མ་གཅིག་བསྲིངས་ནས་ངེད་ཀྱི་རེ་བ་དོན་ལྡན་དུ་མཛད་འཚལ། ཞེས་དྲི་བ་གནང་། དགུང་ལོ་བཅུ་དྲུག་སྐོར་ནས་བླ་སྒྲུབ་སྡུག་བསྔལ་མུན་སེལ་ཐུགས་རྗེའི་ཉི་འོད་ལ་ཁ་སྐོང་ཞལ་ཤེས་ལྷན་ཐབས། དེའི་གེགས་སེལ་དུ་ཕྱི་འབྱུང་བ་ལུས་འཁྲུགས་དང་། ནང་ཏིང་འཛིན་སེམས་འཁྲུགས། གསང་བ་བར་ཆད་གདོན་གྱི་རིགས། དེ་རྣམས་ཐུན་མོང་སྟེ་གེགས་སེལ་བཞི་མཛད་པར་དགོངས་ནས་ཐོག་མར་འབྱུང་ལུས་འཁྲུགས་ཀྱི་གེགས་སེལ་ལ་ཚིག་བཅད་ལྷུག་ཅི་རིགས་པའི་དཔེ་ཚན་དུ་བྱས་པ་པོ་ཏི་རིང་བསྲེལ་ཙམ་གྱི་ནང་ནས་མན་ངག་བྱེ་བ་བྱུང་བའི་བྱེ་བ་རིང་བསྲེལ་ཞེས་ནང་དོན་རེར་ལེ་ཚན་རེ་ཕྱེ་བའི་ལེ་ཚན་བཞི་བརྒྱ་བཅུ་དྲུག་གི་བདག་ཉིད་ཅན་ཕུལ་དུ་བྱུང་བའི་མན་ངག་ཉམས་ཡིག་གི་བསྟན་བཅོས་ཐམས་ཅད་ཀྱི་རྒྱལ་པོ་དེ་ཉིད་བརྩམས་གནང་མཛད་དེ་དུས་ད་ལྟའང་རང་ཅག་རྣམས་ཀྱི་བསོད་ནམས་ཀྱི་སྐལ་བར་ལྷག་པ་འདི་ལྟར་ལགས། གཞན་ཡང་རྒྱུད་བཞིའི་འགྲེལ་ཆེན་པོད་ཤེལ་ཕྲ་མོ་དང་། སྤྱི་དོན་ནམ་རྒྱུད་ཀྱི་དཀའ་གནད་རྣམས་ལ་དྲི་ཚིག་དངུལ་དཀར་མེ་ལོང་། ལེགས་བཤད་ཉི་ཟེར། ཕྱོགས་ཀྱི་སྨན་པ་རྣམས་ལ་སྤྲིངས་ཡིག རང་གཞན་ལ་ཕན་པའི་བསླབ་བྱ་སོགས་ཚད་ལྡན་གྱི་བསྟན་བཅོས་མང་པོ་མཛད། དེ་བཞིན་ལྷོ་ཁ་དང་། དྭགས་ཀོང་ས་ཁུལ་གྱི་གཉལ་ལོར་བྱར་གསུམ། ཨེ་ཉང་ཀོང་གསུམ་རྒྱུད་ཀྱི་སྨན་པ་རྣམས་འདུས་ཏེ་སྐུ་ཉིད་ཀྱིས་ལྗགས་རྩོམ་མཛད་པའི་རིན་ཆེན་འཁྲུངས་དཔེའམ་སྨན་ངོ་གསལ་བྱེད་དང་། རོ་སྐོར་ལྕགས་ཀྱི་ཕྲེང་བ། བདུད་རྩི་རྫིང་བུ། བདུད་རྩི་གཏེར་མཛོད་སོགས་སྨན་རྫས་ཁག་རོ་ནུས་ཞུ་རྗེས་ངོ་བོ་ངེས་ཚིག་བྱེད་ལས་བཅས་ཀྱི་སྒོ་ནས་གཏན་ལ་འབེབས་པའི་བསྟན་བཅོས་རྣམས་འཆད་སྤེལ་དང་། སྨན་ངོ་སྤྲོད་པ་སོགས་མདོར་ན་འཆད་རྩོད་རྩོམ་གསུམ་གྱི་སྒོ་ནས་ལྷོ་རོང་གི་རྒྱུད་དུ་གསོ་རིག་གི་བསྟན་པ་རྒྱ་ཆེར་སྤེལ་ཞིང་དཔལ་ལྡན་ཟུར་ལུགས་ཀྱི་སྲོལ་རྒྱ་ཆེན་པོ་གཏོད་པར་མཛད་དོ།།
